Færsluflokkur: Stjórnmál og samfélag

Nauðungarsölur

Nú nýverið voru samþykkt á Alþingi - ekki í fyrsta sinn - lög um breytingu á lögum um nauðungarsölur sem gera það að verkum að einstaklingar sem eru komnir "í skjól" með greiðslur af stökkbreyttum lánum, í ýmsum myndum geta nú andað eilítið léttar eða a.m.k. til 1. mars 2015.  Það eitt að það þurfi að grípa til þess ráðs að gera slíkar breytingar á lögum um nauðungarsölur - og eins og áður sagði ekki í fyrsta sinn - fær hinn venjulega meðaljón - ætti a.m.k. að gera það - til að staldra eilítið við og hugsa.  Þannig var það allavega með mig þegar ég heyrði af þessum breytingum á lögunum, fyrst þegar þær voru gerðar og þannig var það með mig þegar ég heyrði af þeim breytingum sem gerðar voru núna síðast eða fyrir aðeins örfáum dögum síðan.

Það var svo allt í einu að maður einn að nafni Sturla Hólm Jónsson, sem ég hef reyndar verið málkunnugur til fjölda ára og heilsað þegar ég hef rekist á hann á förnum vegi (enda báðir úr Breiðholtinu) hafði samband við mig símleiðis og falaðist eftir smá fundi með mér.  Ég varð við beiðninni um fund enda vanur að verða við slíkum beiðnum svo fremi að tími minn leyfi slíkt.  Á umræddum fundi sýndi Sturla mér myndbandsupptökur og ýmis skjöl og pappíra tengt nauðungarsöluferli á heimili hans.  Ég horfði á upptökurnar, las í gegnum skjölin, og sat einfaldlega eftir agndofa!!!  Gat það virkilega verið að það sem ég sá og heyrði á upptökunum hefði virkilega gerst með þeim hætti sem upptökurnar sýndu og skjölin - öll sem eitt - studdu?  Gat það virkilega verið að embætti sýslumannsins í Reykjavík ynni sem einskonar "stimpilstofnun" fyrir lánadrottna þessa lands, sinnti ekki rannsóknar- eða leiðbeiningarskyldum sínum gagnvart gerðarþola og gengi ekki úr skugga um lögmæti framlagðra krafna, gagna og skjala í málum er varða aleigu almennings, heimili þess og barna þeirra og já jafnvel ævistarf?  Nei ég trúði varla mínum eigin augum né eyrum þegar ég sá, heyrði og las það sem Sturla lagði á borðið fyrir framan mig!  Ég eiginlega lifði áfram í þeirri afneitun sem ég - og sjálfsagt margir, margir aðrir hafa lifað í til þessa.  Kerfið hlýtur að starfa rétt!  Kerfið hlýtur að gæta - hlutlaust - hagsmuna allra sem til þess leita!  Kerfið hlýtur að standa vörð um þá sem minna mega sín gagnvart ofurefli bankakerfisins!  Kerfið hlýtur að gæta - af hlutleysi - laga og réttar allra málsaðila!  Kerfið hlýtur að sinna leiðbeiningarskyldum sínum o.s.frv!

Mér varð satt best að segja verulega brugðið að sjá, heyra og lesa það sem fram fór þegar fyrsta nauðungarsala á heimili Sturlu fór fram!

Í mínum huga hafði kerfið einfaldlega brugðist á allan mögulegan og ómögulegan hátt!

Sturla tjáði mér einnig á umræddum fundi að hann hefði kært gjörning sýslumanns til lögreglustjórans á höfuðborgarsvæðinu, í þeirri von að þar á bæ myndi kerfið vakna af Þyrnirósarsvefni sínum og eitthvað  yrði gert til að leiðrétta þau rangindi sem unnin höfðu verið gegn svo mörgum fjölskyldum þessa lands.  Allt kom fyrir ekki - kæru Sturlu var vísað frá án rannsóknar og á þeim forsendum að um einkamál værii að ræða.  Allt í raun og veru mjög skiljanlegt þar sem það er einfaldlega ekki hlutverk lögreglu að rannsaka einkamál.  En stöldrum nú aðeins við hér eitt augnablik þar sem Sturla benti á í kæru sinni að hér væri mögulega á ferðnni brot gegn 130. gr. almennra hegningarlaga sem og mögulegra brota gegn nauðungarsölulögum o.fl.  Hér hefði kerfið átt að staldra aðeins við og embætti lögreglustjórans á höfuðborgarsvæðinu að setja málið í frekari skoðun (rannsókn) til að kanna hvað hævt væri í kæru Sturlu á hendur embætti sýslumannsins í Reykjavík en nei kærunni var umsvifalaust vísað frá - án allrar rannsóknar - þar sem hér væri um að ræða einkamál (skuldaskil) en ekkert litið til mögulegra og kærðra hegningarlagabrota.  Sama sagan var uppi á teningunum þegar Sturla leitaði til Ríkissaksóknara með kæru sína.

Ég kynnti mér málið enn frekar eftir tvo aðra fundi með Sturla og tveimur öðrum einstaklingum sem höfðu sömu eða svipaða sögu að segja af samskiptum sínum við sýslumenn þessa lands.  Það var ekki um villst, sýslumenn einfaldlega (m.v. þau dæmi sem ég hef séð) uppfylla hvorki rannsóknar- né upplýsingaskyldur sínar gagnvart gerðarþolum er viðlýtur nauðungarsölur.  Þeir virðast, því miður, taka og stimpla fram og aftur, algerlega án nokkurrar gagnrýninnar skoðunar, skjöl frá meintum skuldareigendum og það án þess að kynna sér skuldaskilmála þeirra lána sem kröfur bankanna byggjast á t.a.m. um framsal skulda á milli kennitalna (bankastofnana) o.fl. í þeim dúr.  

Ég efast ekki um það eitt augnablik að Sturla Hólm Jónsson skuldar einhverjum banka einhverjar upphæðir vegna t.d. húsnæðiskaupa.  Það eru sennilega afar fáir Íslendingar sem ekki skulda einhverri lánastofnun einhverjar fjárhæðir vegna húsnæðiskaupa, atvinnurekstrar o.s.frv.  Sturla Hólm Jónsson verður hinsvegar, líkt og ég og hver annar Íslendingur, að geta treyst því að rétt sé að málum staðið þegar sýslumenn sýsla með það að selja ofan af fólki eigur þess og húsnæði.  Sturla Hólm Jónsson, líkt og ég og hver annar Íslendingur, verður að geta treyst því að sýslumenn gæti hlutleysis í sýslunarathöfnum sínum og "rannsaki" jöfnum höndum atriði - af fyllsta hlutleysi - er varða "sekt eða sýknu" þess sem í hlut á hverju sinni.  Sýslumenn geta ekki leyft sér það að taka - gagnrýnilaust - við hvaða pappírum sem er frá lánastofnunum og selja í framhaldinu eigur fólks og húsnæði ofan af því.  Skuldareigandi hlýtur að þurfa að sýna fram á það með óyggjandi rökum og skjölum að hann sé réttmætur eigandi þeirrar skuldar sem hann krefst lúkningar á!

Það hlýtur einhver vafi að vera á kreiki einhversstaðar, er kemur að nauðungarsölum, fyrst löggjafinn finnur sig knúinn til þess, oftar en einu sinni, að gera breytingar á lögum um nauðungarsölur, er lúta að því að fresta fullnustu slíkra gerða um margra mánaða skeið hverju sinni!  

Með þetta í farteskinu svaraði ég spurningum útvarpsmannsins Markúsar Þ. Þórhallssonar í morgunþætti Útvarps Sögu s.l. föstudag.  Reyndar var rætt um fjölda mörg önnur atriði í þessu viðtali, en orð mín - með öllum mögulegum og ómögulegum fyrirvörum - er lutu að samskiptum mínum við Sturla Hólm Jónsson, sbr. ofanritað og samskipti hans við embætti sýslumannsins í Reykjavík urðu tilefni sérstakrar yfirlýsingar embættisins þar sem látið er í það skína að ég hafi ekki kynnt mér þetta eða hitta.  Dæmigerð viðbrögð þess sem áttar sig á því að kannski hafi nú ekki allt farið fram skv. orðanna og reyndar laganna hljóðan.  Dæmigerð viðbrögð kerfisins að hjóla í manninn en ekki málefnið!  

Málið er nefnilega það - hvað sem líður óundirritaðri yfirlýsingu sýslumannsins í Reykjavík - að ég hef kynnt mér málið, sem og lögin, afar vel!  

Ef sýslumaðurinn er svo viss í sinni sök, sem yfirlýsing embættis hans ber vott um og - að allt hafi farið fram í máli Sturla Hólm Jónssonar  þegar húsnæði hans var selt fyrstu nauðungarsölu - skv. laganna hljóðan í hvívetna og skv. bestu, réttustu, réttlátustu og löglegustu sýslunarathöfnum við feril slíkra mála eins og löggjafinn, með tilheyrandi lögskýringargögnum, hefur mælt fyrir um hvernig skuli farið með, þá hlýtur sýslumaðurinn að geta gefið út opinbera þinglýsta yfirlýsingu, að viðlagðri persónulegri refsi- og fébótaábyrgð þess efnis að svo sé máli farið gagnvart Sturla Hólm Jónssyni og öðrum, sem þegar hefur verið selt ofan af húsnæði og þeim sem enn eiga eftir að lenda í sömu sporum og Sturla Hólm Jónsson!


Hvar eru...

..."Raddir fólksins" núna?  Hvar eru raddirnar sem hrópuðu hvað hæst "Vanhæf ríkisstjórn, vanhæf ríkisstjórn, vanhæf ríkisstjórn.....".  Hvað er að gerast á landinu bláa í dag?

Bankar bera út fjölskyldur úr húsum sínum!  Einstaka sinnum birtist eitthvað sem kallað er "heimavarnarlið" og hreytir fúkyrðum í lögreglumenn og jafnvel efnir til átaka við laganna verði, sem enn og aftur þurfa að standa vaktina lögum skv., þ.a. fulltrúar sýslumanna geti borið saklaus fórnarlömb hrunsins og eftirmála þess út úr híbýlum sínum.  Lögreglumenn sem enn og aftur þurfa að standa á milli í deilum þjóðarinnar við "valdhafa" hennar.

Lausnirnar eru engar aðrar en að koma hræjum banka og sparisjóða til aðstoðar með milljarða útgjöldum úr vösum skattgreiðenda - þjóðarinnar sem borin er á torg og fórnað til dýrkunar Mammon!

Veruleikafirrtur forsætisráðherra, í sínum fílabeinsturni, talar til þjóðarinnar eins og hún sé samansett af fávitum og segir fólksflótta Íslendinga til fjarlægari stranda ekkert meiri en í meðalári, líkt og Gissur komst svo "skemmtilega" að orði í Íslandi í bítið í morgun (14. des. 2011) á Bylgjunni (http://vefutvarp.visir.is/upptokur?itemid=8168).

Forsetinn í enn einu "Drottningarviðtalinu" og eignar sér heiðurinn.

Heimurinn er hreint út sagt dásamlegur þegar öllu er á botninn hvolft.

Lengi lifi Ísland!!!


mbl.is CBC Radio: Forsetinn bjargaði Íslandi
Tilkynna um óviðeigandi tengingu við frétt

Leikritið heldur áfram...

...í boði SA og ASÍ, sem koma nú fram hvert á fætur öðru, blása í lúðra og segja ríkisstjórnina hafa svikið öll þau loforð sem gefin voru í tengslum við kjarasamninga á hinum almenna vinnumarkaði á vormánuðum 2011.  Nú eru ekki nema örfáir dagar, í raun, í það að endurskoðunarákvæði kjarasamninganna verða virk sem, ef svo fer fram sem horfir og m.v. málflutning þessarar samtaka, ætti að verða til þess að kjarasamningum verði sagt upp nú í janúar / febrúar komandi.  En viti menn.  Ætli það verði ekki líkt og áður að SA og ASÍ fallast í faðma á lokasprettinum og segi sem svo að allt sé í blóma, ríkisstjórnin hafi "staðið við sitt" með einhverjum "lokaloforðum" og kjarasamningar halda allt fram að næstu endurskoðun sem fyrirhuguð er árið 2013!

Ég heyrði í einum málsmetandi manni um daginn, sem allmikið vit hefur á atvinnuleysisstigi á Íslandi (sennilega meira vit en nokkur annar) og spurði þennan mæta mann að því hvert raunverulegt atvinnuleysisstig væri á Íslandi ef tekið væri tillit til allra þeirra Íslensku ríkisborgara sem flutt hafa af landi brott til að leita sér að vinnu utan Íslands.  Það stóð ekki á svarinu - atvinuleysið væri að lágmarki 10%!!!!!!  Hér berja menn og konur sér á brjóst og segja atvinnuleysið ekki nema um 7% en nefna í engu þann fjölda íslenskra ríkisborgara sem flutt hafa af landi brott til að afla sjálfum sér og fjölskyldum sínum viðurværis!  Segja atvinnuleysi á undanhaldi en gleyma með öllu - eða öllu heldur kjósa ekki - að horfa til þeirrar staðreyndar að gríðarlegur fjöldi íslenskra ríkisborgara hafa flutt héðan í leit að betri tækifærum í "útlöndum".  Margir hverjir munu sennilega aldrei koma aftur hingað til landsins og á meðan mun landi og þjóð blæða þegar kemur að hátæknimenntuðum einstaklingum sem og minna menntuðum sem allir eru jafn nauðsynlegir sem einstaklingar til að okkar annars ágæta samfélag þrífist.

Það verður virkilega spennandi að fylgjast með faðmlögum SA og ASÍ í janúar / febrúar n.k. þar sem þessi samtök munu, væntanlega, lýsa því yfir að allt hafi gengið að óskum, ríkisstjórnin hafi staðið við sitt - eða lofað ofan á loforðin að standa við sitt - og kjarasamningar muni halda.


mbl.is Slæmar horfur í atvinnulífi
Tilkynna um óviðeigandi tengingu við frétt

Það er oft...

...ótrúlegt að rifja upp hvað þessir háu herrar hafa sagt áður en þeir þurftu sjálfir að fara að glíma við þann vanda sem ekki blasti við þeim að leysa á sínum tíma en gerir nú "allt í einu" eftir að þeir settust á "valdastólana".

Tenglar á bæði álitin eru hér fyrir neðan en fyrra nefndarálitið (2. minni hluti) er frá 3. desember og það seinna (2. minni hluti) er frá 5. desember 2008.  Í fyrra álitinu er, því miður, engar "krassandi" fyrirsagnir líkt og eru í því seinna.  Álitin í heild sinni eru afar athyglisverð aflestrar, svo ekki sé meira sagt:


mbl.is Lilja rifjar upp orð Steingríms um AGS
Tilkynna um óviðeigandi tengingu við frétt

Hvað veldur...

...dræmri kjörsókn í þessari annars nýstárlegu tilraun til að breyta Stjórnarskrá Lýðveldisins Íslands nr. 33. 17. júní 1944? 

Gæti það verið að kjósendur hafi hreinlega engan áhuga á því að breyta Stjórnarskránni?

Gæti það verið að kjósendur hafi áttað sig á staðreyndum málsins þ.e.a.s. að það skiptir í raun engu máli hvað Stjórnlagaþing leggur fram, að afloknum störfum, endanleg útfærsla Stjórnarskrárinnar liggur í höndum Alþingis Íslendinga og þeirra misvitru einstaklinga sem þangað hafa verið kosnir?

Gæti það verið að kjósendur hafi áttað sig á því að Stjórnarskráin er ekki vandamálið heldur þeir sem kosnir hafa verið til að "véla" með framtíð lands og þjóðar á Alþingi Íslendinga?

Gæti það verið að kjósendur hafi áttað sig á því að STÓRA vandamálið er sjálft Alþingi Íslendinga og þeir misvitru eintaklingar sem ratað hafa þangað inn?

Stórt er spurt og eflaust verður fátt um svör enda er ég ekki að æskja svara við þessum spurningum heldur einungis að velta þeim hér upp, í von um að kjósendur spyrji sjálfa sig þessara spurninga.

Að öllu ofanrituðu slepptu er það ljóst að hver einasti kosningabær Íslendingur á ALDREI að láta það hjá líða að taka þátt í kosningum.  Séu kjósendur í vafa um hvern skal kjósa er altént hægt að skila AUÐU og þar með láta hug sinn í ljós!!


mbl.is Dræm kjörsókn
Tilkynna um óviðeigandi tengingu við frétt

Verðmæti hverfa!

Þetta er nokkuð athyglisverð frétt, svo ekki sé meira sagt!  Fréttir hafa verið fluttar af atvinnuleysi á Íslandi í þó nokkurn tíma og er þá horft á opinberar tölur í því samhengi.  Það sem hinsvegar vekur athygli mína, og hefur gert um langan tíma, er sú staðreynd að það er enginn fréttamaður að fjalla um þessar tölur (um fjölda atvinnulausra) í samhengi hlutanna!  Það vill segja að það er enginn fréttamaður á einum einasta fjölmiðli landsins að skoða heildarmynd hlutanna þ.e.a.s. fjöldi skráðra atvinnulausra á Íslandi vs. og með fjölda þeirra sem hafa flutt af landinu frá hruni!!!  Mér segir svo hugur að velflestir (alls ekki allir) sem héðan hafa flutt í kjölfar bankahrunsins væru annars á opinberum skrám yfir atvinnulausa Íslendinga! 

Það væri fróðlegt, svo ekki sé meira sagt, ef einhver fjölmiðlamaðurinn setti sig í þann gírinn að skoða þetta heildarmengi og flytti fréttir af "raunverulegu" atvinnuleysisástandi á Íslandi í stað þess að grípa hráar tölur frá opinberum aðilum og flytja þær fréttir!


mbl.is Verðmætasta fólkið að fara
Tilkynna um óviðeigandi tengingu við frétt

"Drápa"

Ég fékk ábendingu, í gegnum Fésbókina, um nýtt tónlistarmyndband Magnúsar Guðmundssonar (Þeysara) sem ber heitið "Drápa".  Deildi myndbandinu, að sjálfsögðu, samstundis á Fésbókarsíðunni minni.  Textinn er eftir Magnús sjálfan en lagið eftir Bobby Russell.  Texti lagsins, sem að mínu mati er hrein og tær snilld fjallar um hrunið og hefur tekist einstaklega vel til með mynbandið við lagið.

Ég hef gert töluverða leit að texta lagsins á netinu en ekkert orðið ágengt í þeirri leit minni.  Því gerði ég mér lítið fyrir og marghlustaði á lagið um leið og ég skrifaði niður textann.  Ég vona að Magnús fyrirgefi mér að setja hann hér inn....

"Drápa"

Hey, já!

Við áttum eitt sinn gjaldgengt land

Með fjallakrikum og eyðisand

En örfáir aðilar, sigldu því í strand, strand, strand.

Okkur fávísum Frónbúum þótti það svalt

En einn góðan veðurdag hrundi allt

Spekingar sögðu heimsins gengi svo valt, valt, valt.

Undrabörnin í bönkunum

Sátu í djúpum þönkunum

Með starfsemi í útlöndum og fullar hendur fjár.

Ef þú kaupir í mér, kaupi ég í þér

Og síðan kaupi ég í sjálfum mér

Og svo, yfirgefum við þetta volaða sker.

Viðlag

            Þennan dag var þjóðin dæmd í hlekki

            - Sjúbb, sjúbb, ah-úh

            Og komandi kynslóðir fengu þennan arf

            - Sjúbb, sjúbb, ah-úh

            Meðan sekir menn um götur frjálsir ganga.

            - Sjúbb, sjúbb, ah-úh

            Munu ófæddu börnin borga það sem þarf

Bankann Finnur fékk fyrir slikk

Þessi ráðherra fólksins kunni þau trikk

Sagði þau besta vera, fyrir þjóðarhag.

Johnny Boy, Hannes og Pálmi í Fons

Fjárfestu fyrst bara pínupons

Þó aðallega í sjálfum sér, Sterling og aftur í Fons.

Fyrir Sigurjón Þ. og Halldór K

Sigga Einars og Hreiðar Má

Lítið fæst, taldar eignir eru ei lengur á skrá.

- Og koma svo...

Viðlag

Bjarni Ármanns og allt hans lið

Í fjármálum boðaði nýjan sið

Að gera skil, væri óábyrg meðferð á fé.

En Bjöggarnir gerðu eins og hann

Féð allt til þeirra rann en brann

Það sem eftir er, kannski finna má, á Cayman.

Viðlag tvítekið.


Pælingar...

...pælingar, pælingar...

Nú hefur litið dagsins ljós skýrsla þingmannanefndar sem falið var það hlutverk að "rýna" skýrslu rannsóknarnefndar Alþingis og eftir atvikum meta það og gera tillögur um hvort einstaka ráðherrar í ríkisstjórn Íslands hafi, með athöfnum sínum eða athafnaleysi, orðum eða orðaleysi, gjörðum eða gjörðaleysi o.s.frv., gerst brotlegir eða ekki við lög er varða ráðherraábyrgð.  Það vill segja hvort ráðherrum í ríkisstjórn Íslands í aðdraganda og eftirmála hrunsins hefði mátt vera það ljóst, að viðlagðri refsiábyrgð, að hvað það sem þeir sögðu eða sögðu ekki, gerðu eða gerðu ekki o.s.frv. hefði mögulega getað bakað þeim refsiábyrgð að lögum.  Eða hvað?

Í ljósi ofangreinds; skýrslu rannsóknarnefndar Alþingis; skýrslu þingmannanefndar sem falið var það hlutverk að fjalla um skýrslu rannsóknarnefndar Alþingis; þingsályktunartillagna sem komið hafa fram í kjölfar skýrslu þingmannanefndarinnar; stjórnarskrár Lýðveldisins Íslands nr. 33 frá 1944; almennra hegningarlaga; sakamálalaga og þeirra gríðarlegu almannahagsmuna, fyrir íslensku þjóðina, sem hér um ræðir, eftirfarandi ákvæða stjórnarskrár lýðveldisins Íslands...:

2. gr. stjórnarskrárinnar segir m.a.:  "Alþingi og forseti Íslands fara saman með löggjafarvaldið [...]."

11. gr. stjórnarskrárinnar segir m.a.: "Forseti lýðveldisins er ábyrgðarlaus á stjórnarathöfnum.  Svo er og um þá er störfum hans gegna [...]."

13. gr. stjórnarskrárinnar segir m.a.: "Forsetinn lætur ráðherra framkvæma vald sitt [...]."

14. gr. stjórnarskrárinnar segir m.a.: "Ráðherrar bera ábyrgð á stjórnarframkvæmdum öllum [...]."

17. gr. stjórnarskrárinnar segir m.a.: "Ráðherrafundi skal halda um nýmæli í lögum og um mikilvæg stjórnarmálefni [...]."

54. gr. stjórnarskrárinnar segir m.a.: "Heimilt er alþingisþingmönnum, með leyfi Alþingis, að óska upplýsinga ráðherra eða svars um opinbert málefni með því að bera fram fyrirspurn um málið eða beiðast um það skýrslu."

og með hliðsjón af tilskipun nr. 82 frá 1943 um starfsreglur ríkisráðs...

...velti ég fyrir mér eftirfarandi:

  1. Hvernig má það vera að nokkur(rir) ráðherra(r) þeirra(r) ríkisstjórna(r), sem starfaði (störfuðu) í aðdraganda og eftirmála hrunsins getur (geta) verið undanskilinn (undanskilnir) ábyrgð? 
  2. Hvernig má það vera að forseti hins íslenska lýðveldis getur verið undanskilinn ábyrgð?
  3. Er það virkilega svo að það að vera kjörinn til áhrifa, fyrir hönd þjóðarinnar, getur undanskilið þig ábyrgð á þeim grunni að "þú hafir ekki vitað hvað var að gerast."?
  4. Er nóg fyrir mig að segja, hafi ég verið kjörinn þingmaður og í framhaldi af því "valinn" ráðherra að ég hafi "bara" verið samgönguráðherra og þess vegna "bara" átt að fylgjast með samgöngumálum?
  5. Er nóg fyrir mig að segja, hafi ég verið kjörinn þingmaður og í framhaldi af því "valinn" ráðherra að ég hafi "bara" verið utanríkisráðherra og þess vegna "bara" átt að fylgjast með því sem var að gerast utan Íslands og hagsmunum Íslands í þeim efnum?
  6. Er nóg fyrir mig að segja, hafi ég verið kjörinn þingmaður og í framhaldi af því "valinn" ráðherra að ég hafi "bara" verið dóms- og kirkjujmálaráðherra og þess vegna "bara" átt að fylgjast með því sem var að gerast í dóms- og kirkjumálum...... o.frv?

Ég segi NEI!!!  Mér hugnast ekki slíkar "skýringar"!  Mér hugnast það ekki að sá / sú sem kjörin/n er til áhrifa í íslensku þjóðfélagi, hvort sem það er þingmaður eða ráðherra geti leyft sér það að segja eða hugsa "Ég á "bara" að fylgjast með þessum eða hinum málaflokknum"! 

Það hlýtur að vera hlutverk ríkisstjórnar, rétt eins og stjórna fyrirtækja, að gæta að hagsmunum "eigenda" - í þessu tilviki íslensku þjóðarinnar!  Það hlýtur að vera hlutverk ALLRA ráðherra að fylgjast með ÖLLU ÞVÍ sem er að gerast hverju sinni sem haft getur áhrif til þess að hagsmunir þjóðarinnar séu í hættu og bregðast við þeirri hættu með "viðeigandi ráðstöfunum".  Viðeigandi ráðstafanir gætu í því tilviki sem hér um ræðir, hafa verið fólgnir í því að kalla eftir fundum í ríkisstjórn eða eftir atvikum ríkisráði þar sem Forseti Íslands stjórnar fundum.  Var slíkt gert?  Töldu menn sig ábyrgðarlausa af athöfnum eða athafnaleysi ríkisstjórnar Íslands í skjóli þess að þeir hafi "bara" verið ráðherrar tiltekinna málaflokka?  Töldu þingmenn sig ábyrgðarlausa af athöfnum eða athafnaleysi ríkisstjórnarinnar (ríkisstjórnanna) vegna þess eins að þeir voru "bara" þingmenn og vissu ekkert hvað var að gerast?  Fyrir mér lýtur málið þannig út!  Fyrir mér er þetta enganvegin ásættanleg niðurstaða!  Fyrir mér blasir að þurfa að taka á mig ómæld útgjöld vegna þess eins að einhverjir einstaklingar, sem sjálfviljugir buðu sig fram til áhrifaembætta fyrir mína hönd og þjóðarinnar, gerðu eða gerðu ekki það sem í þeirra valdi stóð til að afstýra því áfalli sem yfir mig og þjóðina dundi haustið 2008!  Fyrir mér er niðurstaða þingmannanefndarinnar sem falið var það hlutverk að "rýna" skýrslu rannsóknarnefndar Alþingis VONBRIGÐI!!!!!


mbl.is Áfall að ekki náðist samstaða
Tilkynna um óviðeigandi tengingu við frétt

Dettur...

...einhverjum það virkilega í hug að ráðherrar eða þingmenn verði ákærðir fyrir athafnir eða athafnaleysi sitt í hruninu eða aðdraganda þess?

Nefndin, sem falið var að fjalla um rannsóknarskýrslu Alþingis, er þríklofin í afstöðu sinni.  Segir það ekki allt sem segja þarf?

Nú mun það koma í ljós, sem ég hef áður haldið fram (að vísu ekki hér á þessari bloggsíðu), hver viðbrögð almennings verða við útkomu rannsóknarskýrslu Alþingis.  Nú mun það koma fram hvort almenningur sættir sig við það að, enn eina ferðina, að láta allt yfir sig ganga.  Nú mun það koma fram hvort almenningur sé sáttur við það að "borga brúsann".  Nú mun það koma fram hvort almenningur stendur með sjálfum sér og sinni framtíð.  Nú mun það koma fram hvort almenningur sé sáttur við "skjaldborgina".  Nú mun það koma fram hvort almenningur láti það yfir sig ganga að eintaklingar, sem kosnir eru til áhrifastarfa í þjóðfélaginu, geti gengið frá borði eins og ekkert hafi gerst.  Nú mun það koma fram hvað Alþingi telji felast í orðinu "ábyrgð".

Ég bíð spenntur en veit svo sem ekki með aðra.....


mbl.is Skýrslan kynnt í þingflokkum
Tilkynna um óviðeigandi tengingu við frétt

Það var...

...og!!!  Dómur Hæstaréttar Íslands er orsakavaldurinn hér, að mati stjórnenda fyrirtækjanna Askar Capital og Avant.  Þetta segir mér það einfaldlega að hækkanir lánanna, vegna gengishrunsins, hafi verið færðar strax inn í bókhald þessara fyrirtækja sem "eignir", sem aftur gæti sagt mér það að staða þeirra hafi verið þannig í raun að þau hafi verið löngu hrunin, hvað sem dómi Hæstaréttar líður!  "Eignaaukningin" sem birtist í bókum þeirra við hrun krónunnar varð þess hinsvegar valdandi að þau gátu sýnt fram á betri eignastöðu en ella.

Það var áhugavert að hlýða á viðtölin við Benedikt Árnason, forstjóra Askar Capital í sjónvarpsfréttum í gærkvöldi:

Í viðtalinu á Stöð 2 sagði hann m.a. eftirfarandi:

Það má segja að stóra höggið hafi verið við gengisdóm Hæstaréttar að, að þá rýrnuðu eignir félagsins um, um helming og án þess að, að skuldir hafi breyst á móti. 

Athyglisvert þetta, verð ég að segja!!  Er þetta ekki nákvæmlega það sem hefur verið að gerast hjá stórum hópi Íslendinga í kjölfar hrunsins?  Eignir hafa rýrnað um hundruð þúsunda eða milljónir, án þess að skuldir hafi breyst á móti!!  Ofan í þetta hefur það einnig gerst, hjá stórum hópi Íslendinga, að tekjutap hefur einnig orðið með minnkandi launum, atvinnumissi, hækkandi framfærslu, sem aftur leiðir af sér hækkandi vísitölur, sem aftur leiðir af sér hækkandi lán, sem aftur leiðir af sér...... o.s.frv.......

Er ekki hættan orðin sú, sem við stöndum frammi fyrir nú, að hér verði það sem á útlensku er kallað "Double Dip Recession"?  (http://www.investopedia.com/terms/d/doublediprecession.asp, http://en.wikipedia.org/wiki/Double-dip_recession#W-shaped_recession)

Hvað verður svo framhaldið? 

Nú hefur það verið að gerast, sem gerðist í aðdraganda og kjölfar hrunsins 2008:  aukin mótmæli (með búsáhöldum), mótmælafundir og................hvað svo?  Annað haust og vetur 2008 - 2009??


mbl.is Askar óska eftir slitameðferð - bráðabirgðastjórn skipuð í Avant
Tilkynna um óviðeigandi tengingu við frétt

Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband