Frítt í strætó...

...fyrir alla, alltaf... PUNKTUR! 

Þetta er þjónusta, sem að mínu viti, á að vera gjaldfrjáls og greiðast af útsvari þeirra, sem í þeim bæjarfélögum búa þar sem þjónustunnar nýtur við.  Legg líka til að þjónustan verði útvíkkuð og Reykjanesbæ boðið til samstarfs, við Strætó bs., líkt og gert er með Akranes!!!

Frítt í strætó fyrir Kópavogsbúa

Beðið fyrir mér...

Það var í mars 2004 að maður nokkur bað fyrir sálu minni og kollega míns.  Hann sendi mér svo í kjölfarið áritaða bók, sem hann hafði skrifað, að hluta til um misgjörðir sínar en þó ekki allar.  Hann viðurkenndi þó fyrir okkur að hann hafi borið ábyrgð á þeim verknaði, sem hann var - og er - grunaður um, þ.e. morð á forseta lands síns.  Jafnframt sagði hann að hann hafi, eftir að hann fann nýtt líf sitt í Jesú Kristi, að hann hafi friðmælst við alla nema einn í fjölskyldu þess manns, hvers hann bar ábyrgð á morði á og að fjölskyldan hafi fyrirgefið honum syndir hans.

Mér fannst hálfundarlegt að sitja, í mestu makindum, og spjalla við þennan mann um ástandið sem þá varði í heimalandi hans.  Hlusta á lýsingar hans af þeim atburðum, sem urðu til þess að land hans nánast liðaðist í sundur og varð borgarastyrjöld að bráð, sem geisaði í landinu í áraraðir.  Mér fannst þetta, allt saman, hálf súrrealískt m.a. vegna þess að ég hafði heyrt sögu af viðskiptum manns nokkurs, sem ég þekki allvel, við þennan endurborna morðingja.  Sagan var á þá leið að þessi vinur minn, í miðri borgarastyrjöld í landinu, varð á vegi morðingjans.  Hann (morðinginn) stoppaði vin minn og innti hann eftir því hvað hann væri að gera þarna úti á götu, hvort hann vissi ekki af því að það geisaði stríð í landinu og menn gætu átt það á hættu að vera skotnir, eins og ótíndir flækingshundar, ef þeir væru að þvælast svona úti.  Vinur minn, sem eitt sinn var háttsettur í landgönguliði hers BNA (US Marines) vissi að morðinginn, sem þá bar krómaða skammbyssu með perlumóður skepti (já hljómar eins og lýsing úr einhverjum vestra), hafði miklar mætur á og bar ótakmarkaða virðingu fyrir þeirri herdeild svo hann fór að tala við morðingjann um landgönguliðið.  Við þetta róaðist vinur minn talsvert, sagði hann mér, þó enn óttaðist hann um líf sitt og limi enda, þegar þarna var komið, umkringdur skæruliðum, sem allir voru þungvopnaðir draumavopni skæruliðans, hinum rússnesk ættaða Kalashnikov (AK-47).  Er þessi vinur minn og morðinginn höfðu spjallað í dágóða stund, kvaðst vinur minn hafa séð hvar maður einn kom gangandi niður götuna, haldandi á sjónvarpstæki.  Morðinginn spurði manngreyið, sem greinilega var í skæruliðahópi morðingjans, hvar í ósköpunum hann hafi fengið þetta sjónvarpstæki.  Skæruliðinn kvaðst hafa stolið tækinu í raftækjaverslun ofar í götunni.  Við þessa fregn mundaði morðinginn krómskammbyssuna sína og hleypti af henni í höfuð skæruliðans svo hann féll örendur í götuna.  Jafnframt lét hann þau orð falla að enginn af hans mönnum kæmist upp með þjófnað eða aðra glæpi!!  Þarna skyldi leiðir með þessum vini mínum og morðingjanum. 

Mörgum árum síðar, í mars 2004, sat ég svo á spjalli við morðingjann, Prince Yomie Johnson, fyrrverandi hershöfðingja í her Líberíu og núverandi öldungardeildarþingmann, þar sem ofangreindir atburðir áttu sér stað.  Maðurinn, sem hann er grunaður um að hafa myrt var fyrrverandi forseti Líberíu, Master Sergeant Samuel Kanyon Doe (06.05.51 - 09.09.90), sem aftur hafði komist til valda 12 apríl 1980 með því að myrða þáverandi forseta landsins William R. Tolbert Jr.  

Hann bað fyrir mér, blessaður maðurinn, enda endurborinn til nýs lífs í Jesú Kristi.  Þessi bænastund líður mér aldrei úr minni.

Undirtyllur...

Ég sá litla frétt, á bls. 4, í Fréttablaðinu nú í morgun, þess efnis að einhver undirtylla í utanríkisráðuneyti BNA væri hér á landi í einhverjum viðræðum við íslenska ráðamenn.  Undirtylla þessi er Nicolas Burns aðstoðarutanríkisráðherra BNA.  Þetta væri svo sem ekki í frásögur færandi nema fyrir þær fréttir, sem birtust í kringum brotthvarf herafla BNA héðan, sem ég ætla ekki að fara nánar út í hér að öðru leyti en...

...af því bárust fregnir að þáverandi forsætisráðherra Íslands, Davíð Oddsson, hafi átt í viðræðum við forseta BNA, George Bush, um frestun brotthvarfs herafla BNA héðan.   Síðan, í þessari pínulitlu frétt á bls. 4 í Fréttablaðinu í dag, er sagt frá því að Nicolas Burns hafi hringt í Geir H. Haarde forsætisráðherra og sagt honum af því að heraflinn væri að fara og hvenær hann yrði farinn.

Kemur mér svo sem ekki við en ég er þeirrar skoðunar að forsætisráðherra, eða aðrir ráðherrar lýðveldisins Íslands eigi ekki að vera að eyða tíma sínum í að tala við undirtyllur í ráðuneytum annarra ríkja heldur eingöngu beint við toppana sjálfa.  Lestur þessarar litlu fréttar minnti mig svolítið á skot úr Spaugstofunni þar sem Valgerður Sverrisdóttur, þáverandi utanríkisráðherra (leikin að mig minnir af Sigurði Sigurjónssyni) var sýnd, málhölt, veltandi um í einhverri skrifstofubyggingu í Washington, bíðandi eftir að komast á fund Condoleezza Rice utanríkisráðherra BNA.  Við eigum ekki, sem fullvalda þjóð, að láta bjóða okkur svona framkomu.

Mér leiðast alhæfingar...

Það er EKKI RÉTT að bifhjólamenn gefi skít í hámarkshraða eða önnur lög og reglugerðir.  Hitt er aftur rétt að ákveðinn hópur bifhjólamanna gerir það og ég þori að fullyrða að það er frekar þröngur hópur, sem aftur og aftur gefur þennan skít í umferðarlög og samborgara sína.  Þessi hópur mun ekki láta sér segjast, tel ég, fyrr en eitthvað róttækt er gert í málunum t.a.m. með því að haldleggja og selja bifhjólin undan þeim einstaklingum, sem uppvísir verða að viðlíka glæpum og fólk hefur orðið vart við, í umferðinni, undanfarna daga.

Ekki einungis er þetta fólk stórhættulegt sjálfu sér og oft á tíðum öðrum, göturnar ekki gerðar fyrir slíkan akstur og fullt af óviðráðanlegum aðstæðum í umferðinni, heldur líka gerir þetta það að verkum að ég, sem löghlýðinn bifhjólamaður, þarf fyrir vikið að greiða hærri skatta og skyldur af mínu bifhjóli!!!

Ég skora hér með á bifhjólafólk, almennt, að kæra slíkan hraðakstur til lögreglu, þegar við verðum vitni að honum (oft vitum við hverjir þessir einstaklingar eru)!!!  Þá skora ég á Sniglana sérstaklega, í anda þess, sem Ragnheiður Davíðsdóttir forvarnafulltrúi hjá VÍS sagði í útvarpsviðtali í gærmorgun, að reka þá aðila úr félaginu, sem sýna af sér viðlíka dómgreindarskort og skeytingar- og virðingarleysi gagnvart borgurum þessa lands.

Minnumst þess svo hér, rétt í lokin, að lögreglan er ekki að reyna að hafa hendur í hári þessara vitleysinga af eigin hvötum heldur er henni ætlað að halda uppi lögum og reglum þessa lands!!

Set ég svo Amen - á eftir efninu hér, en vonandi ekki á eftir lífum mikið fleiri bifhjólamanna vegna hraðaksturs...

Hópur bifhjólamanna mældur á 174 km hraða

Og hvað svo?...

Í einhverju fjölmenningarsamfélaginu, úti í hinum stóra heimi, hefði þessi kona verið dæmd til þess að missa aðra höndina...

Svo mörg voru þau orð og set ég svo Amen - á eftir efninu...

Dæmd fyrir hringastuld

Fjölmenning - sæmd...

Sæmdarmorð, sæmdarglæpir, heiður fjölskyldu o.s.frv.  Þetta eru, því miður, allt hlutir sem fylgja "fjölmenningarsamfélögum".

Svo mætti kannski hver spyrja sjálfan sig - Hver er ÉG að gagnrýna menningu annarra, að hluta eða öllu leyti?  Hvað eða hver hefur gert sig umkominn að sæma mig þeim dómaratitli?  Hvernig get ég valið hvað fólk má koma með af sínum menningarheimi til mín? 

Eins og Gunnar Dal heimspekingur sagði við okkur, nemendur sína, í tíma í FB fyrir allmörgum árum (tugum): - Menning er einfaldlega allt það sem maðurinn, segir og gerir.

Svo mörg voru þau orð og set ég svo Amen - á eftir efninu.

Segja að sæmdarglæpum fari fjölgandi í Bretlandi