Datt einhverjum....

Það í hug að hann yrði atvinnulaus eða ætlaði að setjast í helgan stein.  Það er gott að vita að það er ekki bara á Íslandi sem starfræktar eru atvinnumiðlanir (með hálaunastörfum) fyrir uppgjafastjórnmálamenn.....

Blair tekur strax til starfa sem sáttasemjari

Hvernig...

Gengur það að bankar séu að kaupa eignarhluti í fyrirtækjum í samvinnu við önnur fyrirtæki?  Væri ekki eðlilegra að bankarnir lánuðu bara fyrirtækjunum þá peninga, sem upp á vantar þ.a. þau geti keypt hvert annað? 

Ég held nefnilega að það geti skapast hagsmunaárekstrar þegar banki á hlut í fyrirtæki í framleiðslu, sem er í samkeppni við annað fyrirtæki í framleiðslu, sem bankinn á ekki í, en er í viðskiptum við bankann.  Njóta þau fyrirtæki sömu kjara á öllu og að öllu leyti?  Hvað gerist þegar fyrirtækið, sem bankinn á ekki í, lendir í einhverjum tímabundnum fjárhagsörðugleikum?  Fengi það fyrirtæki sömu fyrirgreiðslu og það sem bankinn á í?  Er ekki bankinn þá kominn í lykilaðstöðu til að slá eign sinni á fyrirtækið og sameina það fyrirtækinu, sem hann á fyrir?? 

Hvað með það þegar t.d. tryggingafélög eiga hluti í samkeppnisfyrirtækjum?  Njóta samkeppnisaðilarnir sömu tryggingakjara og þau fyrirtæki sem tryggingafélagið á í?  Kannski, og reyndar vonandi, en mér segir svo hugur að það sé frekar á hinn veginn!!

Hvað segir fjármálaeftirlitið um þessi viðskipti?  Er þetta kannski bara allt í lagi og ég vitleysingur?

Bara smá vangaveltur...

Bakkavör og Glitnir kaupa Creative Foods að fullu

Óvinsæll, óvinsælli...

Óvinsælastur ALLRA, sem kemur svo sem ekki á óvart m.v. aðgerðir mannsins og stjórnar hans í gegnum tíðina.  Nú svo má heldur ekki gleyma því að hann var í raun ekki kosinn forseti í upphafi heldur komst í stólinn á einhverjum tæknilegum atriðum.

Hann er hinsvegar ekki óvinsæll meðal vina sinna eins og t.d. varaforsetans, sem skaut vin sinn á einhverjum fuglaveiðum.  Sá hefur nú aldeilis náð að maka krókinn á viðskiptum Halliburton (hann var stjórnarformaður Halliburton frá 1995 - 2000 og á stóran hlut í fyrirtækinu) nú síðast í Írak.  Þar áður t.d. í sunnanverðri Kosovo - og víðar á Balkanskaganum - þar sem Brown and Root (Kellogg Brown and Root - KBR) byggði STÆRSTU herstöð BNA utan BNA.  Stærri en stærstu herstöð BNA (utan BNA) sem áður var í Þýskalandi...  KBR er að mestu í eigu Halliburton.

Skoðið endilega vef Halliburton á www.halliburton.com

Skoðið líka:

www.corpwatch.org/article.php?list=type&type=15

www.en.wikipedia.org/wiki/Halliburton

www.en.wikipedia.org/wiki/Brown_%26_Root

Bush óvinsælasti forseti Bandaríkjanna í 35 ár

Kaupir hann...

...sig svo frá ábyrgð, eins og saksónari efnahagsbrota hjá ríkislögreglustjóranum, sagði hvítflibba gera í stórum stíl, í opnuviðtali í Blaðinu í gær, þegar mál þeirra kæmu til afgreiðslu yfirvalda á Íslandi.  Saksóknarinn vill opnari umræðu um þessi mál og alvarleika þeirra.  Þar er ég honum fyllilega sammála.  Hér er því komið ágætismál fyrir fjölmiðla til að fjalla opinberlega um.

Málin eru reyndar miklu, miklu fleiri þarna úti.  Skoða mætti t.d. þá staðreynd hvernig tukthúslimur getur orðið stórefnamaður einungis örfáum misserum eftir að honum er sleppt út úr fangelsi þar sem hann afplánaði, tekjulaus (varla stórar tekjur af því að stansa bílnúmer eða steypa hellur), dóm fyrir fíkniefnamisferli!!

Hvar er alvöru rannsóknarblaðamennska á Íslandi stödd??

Rannsókn á störfum fyrrum framkvæmdastjóra VSP ekki lokið

AF HVERJU...

Er yfir höfuð verið að fjalla um þessa blessuðu konu í fjölmiðlum á Íslandi.  Er virkilega ekkert annað, sem skiptir fólk meira máli, sem fjölmiðlar geta verið að fjalla um á sama tíma, í stað þess að fjalla um tilbúin vandamál einhverrar konu í USA, sem ekkert hefur sér til frægðar unnið en að vera barnabarn afa síns heitins??  ÉG SKORA HÉR MEÐ Á MBL AÐ HÆTTA ALLRI UMFJÖLLUN UM PARIS HILTON  og snúa sér þess í stað að einhverjum uppbyggilegum fréttum um afrek ungs fólks á Íslandi!!!!!!

París kann að verða neydd til að fá næringu í æð

Ökuníðinga...

Þarf að stöðva, þ.a. þeir valdi ekki sjálfum sér eða öðrum samferðamönnum í umferðinni stórtjóni, líkamlega og eða fjárhagslega.  Það er nefnilega einu sinni þannig að mótorhjólamaður sem slasast í umferðinni hvort heldur það er af eigin völdum, með háskaakstri, eða annarra veldur ekki eingöngu sjálfum sér tjóni því hann veldur því einnig að ég, sem eigandi mótorhjóls, verð fyrir fjárhagstjóni, með hækkuðum tryggingum á mínu hjóli.  Þetta á að sjálfsögðu líka við um önnur vélknúin farartæki þ.e. þau sem tryggð eru til notkunar.

Ég held reyndar að það sé einhver misskilningur í gangi hjá sumum bloggurum varðandi hugmynd formanns Postula um notkun á naglamottum til að stöðva för ökutækja.  Í fyrsta lagi held ég að nokkuð öruggt megi teljast að naglamottur séu til staðar hjá lögreglu, mig minnir reyndar að hafa heyrt af því fréttir einhvern tíma.  Þá eru væntanlega líka heimildir til staðar til að nota þessar mottur.  Í öðru lagi þá er stórhættulegt að nota slíkar mottur á mótorhjól m.a. vegna þess að ökutækið verður ALGERLEGA stjórnlaust eftir að hafa farið yfir slíka mottu.  Í þriðja hef ég ekki orðið þess var að lögregla hafi verið að ræða um að nota þurfi þennan búnað (les reyndar ekki allar fréttir).  Í fjórða lagi þá tel ég að flokka megi þá sem aka um vegi landsins á þeim hraða, sem heyrst hefur í umræðu um þessi mál undanfarið, sem stórglæpamenn á flótta undan lögreglu og að á þeim flótta þá séu þeir stórhættulegir sjálfum sér og öðrum.  Þar með vaknar spurningin hvort ekki sé réttlætanlegt að nota vald sem leitt getur til dauða "use of deadly force", til að koma í veg fyrir frekari hættu annarra vegfarenda??

Svo mætti gjarna spyrja sig líka hvers vegna, sumir, mótorhjólamenn eru að "fela" skráningarmerki sinna ökutækja með því t.d. að beygla upp á þau, koma þeim þannig fyrir á hjólunum að þau eru illlesanleg, sjá til þess að þau séu það skítug að ekki sé hægt að lesa á þau (þó hjólið allt að öðru leyti sé stífbónað!!!) o.s.frv.  Ég held að þarna sé "einbeittur brotavilji" holdgerður, á ferð.

Ef þú hefur ekkert að fela og ferð eftir lögum og reglum þessa lands þá ætti það ekki að skipta þig neinu máli þó að lögregla hafi afskipti af þér.  Lögin eru jú sett til að vernda þá, sem kjósa að fara eftir þeim, gegn þeim sem kjósa það ekki.

Svo mörg voru þau orð og Amen á eftir því...

Varað við naglamottum

Alger snilld...

Kannski ráð að gera þetta við drossíuna, sem gerð var upp fyrir forsetaembættið á sínum tíma og geyma hana þar til embættið tímir / eða hefur ráð á að borga reikninginn...

Drossía geymd í jörðu í hálfa öld

Frítt í strætó...

...fyrir alla, alltaf... PUNKTUR! 

Þetta er þjónusta, sem að mínu viti, á að vera gjaldfrjáls og greiðast af útsvari þeirra, sem í þeim bæjarfélögum búa þar sem þjónustunnar nýtur við.  Legg líka til að þjónustan verði útvíkkuð og Reykjanesbæ boðið til samstarfs, við Strætó bs., líkt og gert er með Akranes!!!

Frítt í strætó fyrir Kópavogsbúa

Beðið fyrir mér...

Það var í mars 2004 að maður nokkur bað fyrir sálu minni og kollega míns.  Hann sendi mér svo í kjölfarið áritaða bók, sem hann hafði skrifað, að hluta til um misgjörðir sínar en þó ekki allar.  Hann viðurkenndi þó fyrir okkur að hann hafi borið ábyrgð á þeim verknaði, sem hann var - og er - grunaður um, þ.e. morð á forseta lands síns.  Jafnframt sagði hann að hann hafi, eftir að hann fann nýtt líf sitt í Jesú Kristi, að hann hafi friðmælst við alla nema einn í fjölskyldu þess manns, hvers hann bar ábyrgð á morði á og að fjölskyldan hafi fyrirgefið honum syndir hans.

Mér fannst hálfundarlegt að sitja, í mestu makindum, og spjalla við þennan mann um ástandið sem þá varði í heimalandi hans.  Hlusta á lýsingar hans af þeim atburðum, sem urðu til þess að land hans nánast liðaðist í sundur og varð borgarastyrjöld að bráð, sem geisaði í landinu í áraraðir.  Mér fannst þetta, allt saman, hálf súrrealískt m.a. vegna þess að ég hafði heyrt sögu af viðskiptum manns nokkurs, sem ég þekki allvel, við þennan endurborna morðingja.  Sagan var á þá leið að þessi vinur minn, í miðri borgarastyrjöld í landinu, varð á vegi morðingjans.  Hann (morðinginn) stoppaði vin minn og innti hann eftir því hvað hann væri að gera þarna úti á götu, hvort hann vissi ekki af því að það geisaði stríð í landinu og menn gætu átt það á hættu að vera skotnir, eins og ótíndir flækingshundar, ef þeir væru að þvælast svona úti.  Vinur minn, sem eitt sinn var háttsettur í landgönguliði hers BNA (US Marines) vissi að morðinginn, sem þá bar krómaða skammbyssu með perlumóður skepti (já hljómar eins og lýsing úr einhverjum vestra), hafði miklar mætur á og bar ótakmarkaða virðingu fyrir þeirri herdeild svo hann fór að tala við morðingjann um landgönguliðið.  Við þetta róaðist vinur minn talsvert, sagði hann mér, þó enn óttaðist hann um líf sitt og limi enda, þegar þarna var komið, umkringdur skæruliðum, sem allir voru þungvopnaðir draumavopni skæruliðans, hinum rússnesk ættaða Kalashnikov (AK-47).  Er þessi vinur minn og morðinginn höfðu spjallað í dágóða stund, kvaðst vinur minn hafa séð hvar maður einn kom gangandi niður götuna, haldandi á sjónvarpstæki.  Morðinginn spurði manngreyið, sem greinilega var í skæruliðahópi morðingjans, hvar í ósköpunum hann hafi fengið þetta sjónvarpstæki.  Skæruliðinn kvaðst hafa stolið tækinu í raftækjaverslun ofar í götunni.  Við þessa fregn mundaði morðinginn krómskammbyssuna sína og hleypti af henni í höfuð skæruliðans svo hann féll örendur í götuna.  Jafnframt lét hann þau orð falla að enginn af hans mönnum kæmist upp með þjófnað eða aðra glæpi!!  Þarna skyldi leiðir með þessum vini mínum og morðingjanum. 

Mörgum árum síðar, í mars 2004, sat ég svo á spjalli við morðingjann, Prince Yomie Johnson, fyrrverandi hershöfðingja í her Líberíu og núverandi öldungardeildarþingmann, þar sem ofangreindir atburðir áttu sér stað.  Maðurinn, sem hann er grunaður um að hafa myrt var fyrrverandi forseti Líberíu, Master Sergeant Samuel Kanyon Doe (06.05.51 - 09.09.90), sem aftur hafði komist til valda 12 apríl 1980 með því að myrða þáverandi forseta landsins William R. Tolbert Jr.  

Hann bað fyrir mér, blessaður maðurinn, enda endurborinn til nýs lífs í Jesú Kristi.  Þessi bænastund líður mér aldrei úr minni.

Undirtyllur...

Ég sá litla frétt, á bls. 4, í Fréttablaðinu nú í morgun, þess efnis að einhver undirtylla í utanríkisráðuneyti BNA væri hér á landi í einhverjum viðræðum við íslenska ráðamenn.  Undirtylla þessi er Nicolas Burns aðstoðarutanríkisráðherra BNA.  Þetta væri svo sem ekki í frásögur færandi nema fyrir þær fréttir, sem birtust í kringum brotthvarf herafla BNA héðan, sem ég ætla ekki að fara nánar út í hér að öðru leyti en...

...af því bárust fregnir að þáverandi forsætisráðherra Íslands, Davíð Oddsson, hafi átt í viðræðum við forseta BNA, George Bush, um frestun brotthvarfs herafla BNA héðan.   Síðan, í þessari pínulitlu frétt á bls. 4 í Fréttablaðinu í dag, er sagt frá því að Nicolas Burns hafi hringt í Geir H. Haarde forsætisráðherra og sagt honum af því að heraflinn væri að fara og hvenær hann yrði farinn.

Kemur mér svo sem ekki við en ég er þeirrar skoðunar að forsætisráðherra, eða aðrir ráðherrar lýðveldisins Íslands eigi ekki að vera að eyða tíma sínum í að tala við undirtyllur í ráðuneytum annarra ríkja heldur eingöngu beint við toppana sjálfa.  Lestur þessarar litlu fréttar minnti mig svolítið á skot úr Spaugstofunni þar sem Valgerður Sverrisdóttur, þáverandi utanríkisráðherra (leikin að mig minnir af Sigurði Sigurjónssyni) var sýnd, málhölt, veltandi um í einhverri skrifstofubyggingu í Washington, bíðandi eftir að komast á fund Condoleezza Rice utanríkisráðherra BNA.  Við eigum ekki, sem fullvalda þjóð, að láta bjóða okkur svona framkomu.